Showing posts with label مصر. Show all posts
Showing posts with label مصر. Show all posts

Tuesday, May 15, 2012

Saturday, May 7, 2011

Tuesday, April 8, 2008

935

Posted by Abouz on April 08, 2008 with No comments


كان في مره اربعه
طلبوهم يتحطوا في موقف غامض
ال ايه مطلوب يحرسوا صندوق
وشوية ورق مع ناس لابسين غامق
الورق كان عدده 935 ورقه
واياك يابني تنقص ورقه
وقالولهم هيجيكم ناس
ادوا لكل واحد ورقه
يملا 18 من ورقه
وقالولهم الورقه التانيه يملى منها 10
قالوا وماله ما هو برضه الناس محتاجه تطلع من الغرقه
و شويه وجالهم واحد باشا
راح داخل فجأه ماهو باشا
البدله تحتيها عفاشه
انا اسمي مكتوب في الورقه الباشا قال
وعايزكم تملولي 100 200 ورقه
وانا مش هسكت هديكم ع لورقه ورقه
الواحد منكم غلبان و بيقبض يعني كام ورقه؟؟؟
قام قال واحد منهم مش عايزيين ورقك
الناس جايه واهي تختار اسمك او حتى ترمي الورقه
زعل جدا-الباشا- وغظب وعرقه زي المرقه
واحد قام قايل ال عايز يساومنا بكم ورقه
رد عليه واحد انا برضه مستعب ع الجرأه
هنا واحد قال ماهو واحد تاني كان عايز 100 ورقه
او يمكن يدوب يطلب ورقه
واحد بيقول وحياة الانجيل ماخد ورقه
واحد قاله انا ربي ومحمد لعنوا الرشوه
وشويه وجالهم الراجل اللي اداهم الصندوق
مش انتم اولى بالورقه
100 ورقه بيهم انتم اولى
قام رد عليه واحد و بجرأه لا مش اولى
واحد قاله هي مقاوله بتبيعوا الناس ب200 ورقه
و تصدق
كام واحد جه يعرض عرضه و بنفس الجرأه
و الكل يقوله صاحب الورقه اولى بالورقه
وجابلهم الاكل اياه ابو 20 ورقه
ورفضوا
وجابولهم العرض ابو 400 ورقه
وضحكوا


ماهو مش ممكن اللي اشترى كل الصناديق
يفهم ان في حد برئ
انك ممكن ترفض تبقى مفيش
انك لك رب اداك العيش
و انك لك حد علشانه تعيش
وانك ان بعت متعرفش تعيش
وانك لو سالك ابنك فين العيش
لازم ردك يبقى
من تعبي وكدي
او يابني مفيش

Monday, April 7, 2008

عاشت مصر حره مستقلة الشاعر:أحمد أبوزيد

Posted by Abouz on April 07, 2008 with No comments


عاشت مصر حره مستقلة ......
عاشت مصر عبده مستغله ....
عاشت مصر ولا ماتت ... مش حتفرق ...
مش قالولك كل حاجه مستقره ؟؟
مش قالولك لسه فيها الخير ببسري ؟؟؟
مش قالولك ان لسه النيل بيجري ؟؟؟
طب رغيف العيش ..... مفيش
طب وفين الجيش ؟؟ .... مفيش
وطب ونعمل ايه ؟؟ .... حشيش
يبقى لازم تبقى حره ....
هي عاشت ولا ماتت برده حره ....
تدي خير .... او تدي غير ....ولاد بلدها ...هي حره ...
هي حره وبراحتها ....
جوه بيتها ...بره بيتها ....
ف انتصارها ...وف خيبتها ....هي حره ...
تبقى ملكه ...لابسه تاج ... . مش محتاجاك .... هي حره ...
تبقى حتى بنت ليل ... تسهر معاك ... هي حره ...
قلت مره .... في المظاهره ....
ايوه عاشت مصر حره ..... طلعت بره ....
من يوميها .... لسه بره ...وهي حره ...
ابقى جوه....ابقى بره ....
واتحرم من ارضها كل يوم ييجي الف مره .... وهي حره ...
هي مش لما الجميله بتفتقر .... تقلع هدومها وتبقى ارما ....
حتى لما بقت لادوس ... مفيش فلوس ...
امتى نصحى من الكابوس .... ؟؟؟
امتى نفهم م الدروس ...؟؟؟
امتى نبقى في المجره ؟؟؟؟
بس رغم كل حاجه ....
برده عاشت مصر حره ... الف مره ...

Subscribe to: Posts (Atom)