الاستاذ عزت ناظر مدرسة 15 مايو

Ahmad Abouzaid Poet 

لن انسى هذا الرجل...مهما مر الزمن...... واسمحولي اكمل بالعاميه عشان احكي بشكل اقرب لما حدث....
الراجل العظيم ده...الله يمسيه بالخير..... كان ناظر المدرسة اللي انا كنت لسه داخلها من شهر تقريبا...كنت لسه جاي من دولة العراق...وكنت وقتها دخلت المدرسه دي سنة خامسة ابتدائي..... وكنت قبل ما اجي مصر متفوق جددددددددااا في العراق لدرجة اني كنت الاول على المدرسة كل سنة واخويا الكبير كان الاول على المدرسة برده طول الوقت.. كل منا في السنة الدراسية بتاعته.... ولما دخلت المدرسة...كان في مدرسة ( ابله ليلى )...مدرسة اللغة العربية.... وكانت عامله حصة املاء في بداية السنة عشان تعرف مستوى التلاميذ في الاملاء....وانا كنت متعود من دراستي في العراق..اني اكتب الاملاء بكل دقة وبالتشكيل...بالاضافة لان خطي كان حلو جددداااا
يعني باختصار لما تشوف الاملاء بتاعتي تحس انك بتقرا كتاب مطبوع تقريبا...ونادرا جدا ما يكون عندي اخطاء..... ولما شافت ابله ليلى الاملاء بتاعتي...بدون تردد...شطبت على الورقة بتاعتي وكتبتلي كلمة كبييييييييييييره بخط ضخم باللون الاحمر في نص الصفحة

(((((((((((((((((غشــــــــــــــــــــــــاش )))))))))))))))))))))

انا فضلت اعيط...وموت نفسي من العياط...وطلبت مني يومها اجيب ولي امري... وانا رحت البيت وانا منهار وقلت لامي...اللي حصل....امي
الله يمسيها بالخير.... زعلت جدددددددددااا وكان نفسها تروح المدرسة في نقس اللحظه...بس والدي...الله يمسيه بالخير..... قالها لا...روحي بكره مع الولد وقابلي المدرسة وفهميها... ولما راحت امي تاني يوم....رفضت تقابل المدرسه..ودخلت للناظر ...استاذ عزت..... وحكتله اللي حصل....واذكر انها قالتله جمله....رائعه....قالتله...مش معنى ان التعليم في مصر بايز...ان المتفوقين يبقو غشاشين...بس للاسف انتو مش متعودين على تلاميذ زي احمد....
قالها استاذ عزت...حضرتك..ولا تضايقي نفسك... وقالي تعالى يا احمد....ونده للمدرسة ابله ليلى....وسالها ...عن اللي حصل...قالتله...ان الولد غاشش من الكتاب والدليل انه بيرسم حتى التشكيل...لانه مش فاهم حاجه....
قالها وايه اللي خلاكي متأكده انه غشاش.... وندهلي...واداني ورقه وقلم...وكان القلم الخاص بتاعه.... وبدأ يمليني نفس الاملاء تاني قدام امي والابله...وكتبتها كلها بنفس الطريقه.....ولما خلصت...بص على الورقه..وبصلي...وابتسملي.... وقال لامي...انا بالنيابه عن التعليم في مصر ...بعتذرلك...عن الاتهام اللي اتهمته ابله ليلى لابنك...واحنا فخورين بوجود احمد في مدرستنا.... ولقيت ابله ليلى....بكت...وخدتني في حضنها.... وقالتلي حقك على يا احمد...بس بجد انت مفيش زيك لدرجة اني كنت متاكده انك غاشش....انا اسفه يا حمد...وقالت لمام انا اسفه يا مدام..... وراحت امي قطعت الورقه اللي مكتوب فيها غشاش...وقالت للاستاذ عزت..انا مقبلش ان كشكول ابنييكون في ورقه زي دي.... والاستاذ عزت...قالها ده حقك...واحنا بنعتذرلك كمان مره...وبصلي وقالي يا احمد...انت هنا في المدرسه مكتبي مفتوحلك في اي وقت...
ومن يومها وانا اهم تلميذ في المدرسة..لدرجه اني سبت المدرسه قبل سنة سادسه ما تبدأ وسافرنا تاني للعراق..وساعتها استاذ عزت كان حزين..وقال لامي انا حزين..لان احمد كان املنا في انه يكون احد الاوائل على الجمهورية من مدرستنا....يا خساره .....
الله يمسيهم بالخير جميعا.....
مازلت اذكرك يا استاذ عزت...ولن انساك...وسأحكي لابني وحفيدي عنك